Duodjeinstituhtta heiveha bagadallama daid ođđa corona ávžžuhusaid ektui áigodagas 25.03-12.04.21. Bargobájit leat giddejuvvon dan namuhuvvon áigodagas. Dalle eai lágiduvvo kurssat jna. Mii leat olámuttus telefuvnnas dahje e-poasttain.

Duodjeinstituhtta tilpasser seg etter de nye nasjonale retningslinjene fra og med 25.03-13.04.21. Verkstedene er stengt i denne perioden. Kontakt oss via telefon eller e-post.

Duodji lea čoahkkedoaba mii fátmmasta iešguđetge doaimmaid nu go giehtaduoji, dáiddaduoji, garraduoji ja smávvaindustriija. Olu sápmelaččaide dat lea eallinvuohki. Duddjoma vuođđu lea vuosttažettiin leamaš ráhkadit atnudiŋggaid ja biktasiid iežas atnui, muhto maiddái čábbodaga čájeheapmi ja buvttadeapmi lonohallama ja vuovdima várás.

Duodji speadjalastá sámi eallinvuogi ja sámi kulturárbevieruid. Duodji lea sámi kulturdovdomearka, estehtalaš ovdanbuktinvuohki man iešvuođat rievddadit guovllus guvlui. Duodji speadjalastá luonddugeográfalaš, ekologalaš ja ekonomalaš diliid mat oktiibuot ovddastit davvi-, julev- ja lullisámi duoji regionála árbevieruid. Go duddjo, de gulahallá ávnnasgeavaheami, teknihkaid ja proseassaid bokte, ja formalestehtalaš gaskaomiid nu go hámi, ivnni ja ornamentihka bokte.

​Buktagat leat geavatlaččat ja muitalit álbmoga, birrasa ja iešguđetge kulturrávnnjiid birra mat leat leamaš áiggiid čađa. Duodji hábmejeaddji doaibman lea dehálaš oassi sámi kultuvrras. Sámi duodji lea identitehtaovddideaddji fáktor seamma ládje go eará ealáhushámit ja kulturdovdomearkkat nu go giella ja kulturmuittut.

Duodjeinstituhta (DI) váldoulbmil lea ovddidit ealáhusovdáneami árbevirolaš duoji vuođul. Ulbmil lea ásahit eambbo bargosajiid sámi duodjeárbevieruid olis. Duodjeinstituhtta lea álggu rájes bargan bajitdási ovdánahttin- ja gelbbolašvuođaguovddážin duoji ektui miehtá Sámi. Dat galgá leat riikkaviidosaš teknihkalaš/fágalaš gelbbolašvuođaguovddáš duoji dáfus. Dat fállá bálvalusaid/gelbbolašvuođa, lanjaid ja teknihkalaš rusttegiid vai sáhttá aktiivvalaččat bargat márkanvuđot duodjebuvttaovddidemiin ja duodjebuvttadanovddidemiin. DI veahkeha duojáriid fágalaš rávvagiiguin, lea ságastallanguoibmi ásahemiid oktavuođas, ja rávve muđui skuvllaid, ásahusaid ja organisašuvnnaid ja earáid duodjefágalaš áššiin. Duodjeinstituhtta sáhttá maiddái álggahit iešheanalaš prošeavttaid, dahje ovttasbarggus earáiguin dahje jus earát sihtet. Duodjeinstituhtta galgá leat ovdavázzin duojáriid fierpmádagaid ásaheapmái ja ovddideapmái. Duodjeinstituhta strategalaš váldodoaibma lea leahkit teknihkalaš ja fágalaš gelbbolašvuođaguovddážin duoji ektui Sámis. Dát mielddisbuktá čuovvovaš beliid mat galget leat instituhta guovddážis:

  • Ásahus galgá bargat duodjeealáhusa ektui ja eará ásahusaid ektui mat man nu ládje barget duoji ovddidemiin
  • Ásahus galgá vuođustuvvot sámi kultuvrii, ja galgá márkaneavttuid dáfus doalahit dán vuođusteami
  • DI galgá doarjut báikkálaš joavkkuid ja servviid